CEBU, Philippines - Gipahibawo ni PSupt. Aileen Recla, hepe sa kapolisan sa dakbayan sa Talisay nga nagmingaw na ang Barangay Maghaway human sa gihimong pagpangronda sa panimay ni Konsehal Felix Abacajan Jr. Matag karon ug unya, matud ni Recla nga ang iyang mga sakop sakay sa ilang patrol car, mosuroy sa lugar ni Abacajan hinungdan nga ilang na-obserbahan nga mingaw na ang maong lugar.
Si Abacajan nakasibat atol sa pinusilay tali sa kapolisan. Apan ang iyang igsuon nga si Joser ug laing kauban ang napatay sa mga otoridad.
Dugang ni Recla nga aduna silay nadawat nga impormasyon nga adunay gipanglubong nga tawo sa lugar sa mga Abacajan apan hangtud karon nagsige pa sila og pangita niini. Laing kasayuran nga ilang nakuha nga ang lugar sa mga Abacajan giingong ibaligya na.
Matud niini nga padayon nga gikumbinsi si Abacajan sa iyang mga suod nga higala nga motahan apan hangtud karon wala pa gihapon kini nipatim-aw.
Masaligon si Recla nga dili madugay makuha ra gihapon nila ang maong konsehal. (BANAT NEWS)