CEBU, Philippines - Ipatuman sugod ugma ang bag-ong oras sa pagkolekta sa basura sa Dakbayan sa Sugbo.
Matud ni John Paul Gelasque, assistant head sa Department of Public Services, nga ang unang duha ka semana matawag nga adjustment period.
Dili mominus sa 80 ka Barangay Environmental Officers ang ilang i-assign aron motabang sa pag-monitor sa mga residente sa nagkadaiyang barangay mahitungod sa bag-ong schedule nga ipatuman.
Ang mga BEOs, kinsa sagad nila gikan sa mga bukirang barangay, grupo nga ipakatap aron maoy moila sa mga dapit diin ilabay sa mga residente ang ilang basura.
Ang paglabay sa basura magsugod sa alas 5 sa hapon hangtud sa alas 7 sa buntag ug dili pwede molabay gikan sa alas 7 sa buntag hangtud sa alas 5 sa hapon.
Ang masakpan multahan og P500 ug hatagan og citation ticket.
Ang malata kolektahon sa Lunes, Miyerkules, Biyernes ug Sabado samtang ang dili malata ug mga residual wastes kolektahon sa Martes, Huwebes ug Domingo.
Matud ni Gelasque nga kaniadto samtang nangolekta og mga basura nakamugna gyud og trapik ang garbage truck nga magpundo sa dalan apan nunot niining kausaban nga ipatuman makatabang kini aron maminusan ang kahuot sa dagan sa trapiko ug sayo sa buntag limpyo na ang siyudad.
Dugang niya nga ang DPS dunay commitment sa Department of Environment and Natural Resources ug Environmental Management Bureau nga alas 7 buntag hangtud sa alas 5 sa hapon walay makasulod sa Inayawan landfill ug ila kining pahimuslan sa pagtabon sa mga basura ug pag-ayo sa service road. (BANAT NEWS)