CEBU, Philippines - Gipalagpot na ang usa ka enforcer sa Provincial Environment and Natural Resources Office (PENRO) kinsa gipasanginlang nangilkil sa mga haulers ug laing duha ang gipaubos sa imbestigasyon karon.
Ang officer-in-charge sa PENRO, Baltazar Tribunalo, niklaro nga wala siyay kalabutan sa gihimo sa iyang mga sakop ug posibleng gigamit lang ang iyang pangan.
Usa ka Edgar Yuchengco ang nag-post sa Facebook nga nag-awhag sa gobernador nga pabantayan ang mga kawani sa PENRO tungod sa korupsiyon.
Matud ni Yuchengco nga tulo na ka higayon ang iyang mga trucks nga nagkarga og bas ang gipahunong sa mga sakop sa PENRO sa Dakbayan sa Naga ug Toledo ug nangayo og P5,000 aron dili dakpon.
Giingong ang mga sakop sa PENRO nagsakay og mga motorsiklo ug dunay mga badge sama sa mga polis.
Dunay higayon nga nigamit usab og sakyanan nga color brown nga Terrano ang maong mga sakop sa PENRO.
Dugang niya nga nanawag siya sa PENRO aron makig-estorya sa hepe sa maong buhatan apan dili niya kini maestorya tungod kay permanenteng wala sa iyang opisina.
Si Tribunalo gipasanginlan usab nga corrupt diin gigamit niini ang iyang mga personnel aron sa pagpahigayon og pagpangilkil sa mga haulers.
Si Tribunalo nihimakak sa pasangil ug matud niya nga posibleng nasakitan ang mga haulers tungod sa subsob nilang operasyon batok sa mga kalapasan ug pabayron gyud sila sa tukmang multa.
Matud usab ni Tribunalo nga nag-post siya og mensahe sa FB ni Yuchengco nga makig-estorya siya apan giingong wala motubag si Yuchengco.
Si Tribunalo nihagit kang Yuchengco nga mopadangat og pormal nga reklamo batok sa mga sakop sa PENRO nga giingong nalambigit sa pagpangilkil aron maaksiyonan.
Kung mapamatud-an ang maong duha ka kawani nga nalambigit usab og pangilkil, posibleng malagpot usab sila sa trabaho.
Gawas sa tulo ka polis nga mo-escort sa operasyon ang PENRO, dunay 20 ka enforcers ug inspectors sa ilang operasyon batok sa mga illegal quarry ug hauling.
Kasagaran sa maong mga enforcers ug inspectors mga job order personnel. (BANAT NEWS)