Lima ka bata gimaltrato niikyas sa orphanage

CEBU, Philippines - Ang Provincial Council for the Welfare of Children (PCWC) naningil sa Department of Social Welfare and Development Office- Field Office-VII sa resulta sa fact-finding investigation kabahin sa giingong pagpangabuso sa lima ka batang babaye kinsa miikyas gikan sa kostudiya sa usa ka orphanage nga nahimutang diha sa San Carlos Heights, Brgy. Mambaling, Dakbayan sa Sugbo.

Ang maong mga bata atoa na karon sa Provincial Social Welfare and Development Office (PSWDO) . 

Usa ka tinubdan kinsa nagdumili sa pagpahingan mibutyag nga giingong ang maong center gidumala sa usa ka langyaw.

Giingong grabe ka estrikto ang nagdumala niini base sa sumbong sa mga bata, kadtong masayop silotan dayon, ug ang kinagamyang silot ¼ sa plato ra nga kan-on.

Gawas pa niana, aduna say physical punishment  ug ang pagsulod  sa mga bata ngadto sa “lamokan room.”

Ang maong lamokan room gubaon nga building unya adto isulod ang bata dayon siradoan.

Aduna say nadawat nga impormasyon ang tinubdan nga ang mga bata nga babaye adto kini pakatulgon uban sa executive director sa center.

Septiyembre 1, 2016 dihang si Bise Gobernador Agnes Magpale , co-chair sa PCWC mipadangat og suwat ngadto sa Field Office-VII sa DSWD nga naghangyo nga ipaimbestigar ang giingong pagmaltrato sa lima ka bata kinsa miikyas gikan sa nahisgutang center.

Ang maong mga bata na-rescue sa Women and Children Protection Unit (WCPU) sa Cebu City Police Station 10 ug sa Department of Social Welfare and Services (DSWS) sa Dakbayan sa Sugbo ug gidala karon diha sa PSWDO.

Usa ka fact-finding team  nga gilangkuban og tulo ka social workers gikan sa regional field office ang giumol aron moimbestigar bahin sa insidente.

Niadtong Septiyembre 14, 2016 ang fact-finding team ug PSWDO personnel miadto sa maong center apan wala sila toguti sa tagdumala nga makasulod sa maong pasilidad.

Ang maong insidente gi-report sa team ngadto sa Police Station 10 sa Barangay Punta Princesa. (BANAT NEWS)