Korupsiyon gihimakak

CEBU, Philippines - Nunot sa report sa Social Weather Station survey   ang Metro Cebu maoy ikaduha sa nasud sa korupsiyon sa pagproseso sa mga dokumento sa mga buhatan sa gobiyerno.

Giingong dili dayon madali ang pagproseso sa mga dokumento sa mga buhatan sa gobiyerno kun dili mohatag og padangog ang magproseso. Si Benjamin Joseph Yap, Investment Promotion Officer sa Kapitolyo nihimakak nga adunay nahitabong korupsiyon sa Kapitolyo. Hinuon matud niya nga ang daghang proseso nga agian sa pagkuha og dokumento, ang nadawat nila nga reklamo gikan sa mga negosyante.

Matud ni Yap nga ang iyang buhatan maoy facilitator ngadto sa mga negosyante sa pagtukod nila og negosyo sama sa pagpangita og location site kun asa nila tukuron ang negosyo. Gihimakak usab niini nga adunay mga negosyante o nagproseso og dokumento nga nitanyag nga mohatag og ganti aron madali ang pagproseso sa mga dokumento niini.

Matud ni Yap nga aron matabangan ang mga investor, nagtukod sila og Cebu Investment Assistant Network nga gilangkuban sa mga national nga ahensiya, lokal nga kagamhanan sa dakbayan sa Sugbo, Lapu-Lapu ug probinsiya.

Ang mga investor mahimong moduol sa buhatan ni Yap sa probinsiya aron matabangan kun duna silay planong motukod og negosyo sa Sugbo aron madali ang ilang pagproseso sa mga dokumento. Dugang ni Yap nga estrikto sila batok sa korupsiyon ug ang adbokasiya nila mao ang pagtabang sa mga investor aron mouswag ang ekonomiya ug makabaton og daghang oportunidad ang katawhan. (BANAT NEWS)