Siyudad sa Sugbo moabang og 5 ka dumptruck

CEBU, Philippines - Aron mamenosan ang graft and corruption ug matubag ang mga isyu sa siyudad sa pagmentinar og mga ekipo, usa ka eksperimento ang buhaton ni Cebu City Mayor Tomas Osmeña.

Gipasabot ni Mayor Osmeña nga mag-outsource og mga truck ang siyudad diin dili lang ang mga private owner ang makaginansiya niini, lakip na ang dakbayan.

Gihulagway sa mayor nga sa niaging administrasyon, ang tanang bag-o nga dumptruck nga gipalit, walay gamit kay matud pa ang nagdagan nga truck sa siyudad karon kadto pang mga Hino trucks nga napalit panahon niya, pipila ka tuig na ang nakalabay.

Dugang ni Osmeña nga kun moabang og truck, walo ka oras matag adlaw sulod sa lima ka adlaw sa usa ka semana, apan ang sitwasyon sa City Hall, 24 oras kini sulod sa pito ka adlaw.

Gihimug-atan sa mayor nga wala’y problema niya kun unsay kondisyon sa truck ug kun surplus ang ligid niini, ang importante nga naghimo kini sa iyang trabaho ug nagdagan.

 Iyang gitataw nga ang tag-iya sa truck maoy mobayad sa maintenance sa sakyanan lakip na sa drayber aron dili makareklamo ang mga tag-iya nga ang mga drayber sa city hall mga badlungon. Hinoon, andam ang siyudad nga mosuplay og gasolina ug mobayad sa loader.

 Ang mga kaayuhan nga makuha sa siyudad, makakuha og maayong serbisyo bugti sa pundo nga gipagawas. Wala nay kawat nga mahitabo sa mga spare parts ug dili na mahimo nga magdawat og sweldo ang mga drayber bisan og walay gitrabaho.

 Nunot niini, giawhag ni Mayor Osmeña ang mga pribadong sector nga gustong moapil sa iyang plano dungan sa paghulagway nga usa kini ka maayong higayon aron masinati ang ingon niining inobasyon sa panggobiyerno. (BANAT NEWS)