CEBU, Philippines - Wala gipamugos ni Kongresista Rodrigo Abellanosa (Cebu City South District) ang iyang tunghaan nga adto mo-eskwela ang mga scholars sa kagamhanan sa dakbayan.
Matud ni Cebu City Mayor Tomas Osmeña nga wala nasayud niini ang buhatan sa Ombudsman nga ang mga scholars ang nipili sa Asian College of Technology and International Education Foundation (ACTIEF) nga gidumala ni Abellanosa.
Konsehal pa sa Siyudad sa Sugbo ug maoy nagkupot sa scholarship program niadtong 2011.
Matud ni Osmeña nga dili matawag og graft and corruption ang nahitabo diin ang ACTIEF ang dunay labing nindot nga tanyag kaniadto tungod sa kabarato sa financial requirement.
Wala usab babagi ni Abellanosa ang ubang tunghaan nga makasalmot sa scholarship program.
Gihulagway sa Ombudsman nga kalapasan sa Republic Act 3019 o ang Anti-Graft and Corrupt Practices Act ang pagpirma og Memorandum of Agreement (MOA) tali sa siyudad ni Abellanosa isip presidente sa ACTIEF sanglit konsehal siya niadtong higayuna.
Matud pa ang tunghaan nakapahimulos og P51 milyones nga nakolekta gikan sa siyudad.
Alang kang Osmeña, adunay korupsiyon kung gisolo pa ni Abellanosa ang programa apan ang mga tinun-an ang gipapili kung asa sila gusto motungha.
Gisalig ni Abellanosa sa iyang mga abogado ang kaso human gibasura ang motion for reconsideration nga ilang gisang-at. (BANAT NEWS)