CEBU, Philippines - Nagkinahanglan og kompaktor ug garbage truck ang merkado sa Tabunok sa dakbayan sa Talisay aron mamentinar ang pagkuha sa mga basura nga maoy hinungdan nga baho kaayo ang lugar.
Si Konsehal Manuel Cabriana kinsa maoy chairman sa committee on market and slaughterhouse nibutyag nga naguba na ang kompaktor nga gipalit sa niaging administrasyon hinungdan nga adunay mga basura sa merkado nga wala gyud maugkat hinungdan sa kabaho sa palibot.
Matud ni Cabriana nga gawas sa kompaktor, nagkinahanglan sab sila og garbage truck. Gipasabot niini nga ang kompaktor maoy mokolekta sa mga basura’ng basa ug dali’ng mabaho samtang ang garbage truck maoy mokuha sa ubang basura.
Buot sa konsehal nga magpabiling limpyo ug dili mubaho ang merkado aron magpabiling daghan ang mangumpra ug masiguro nga limpyo ug luwas ang mga baligya sa maong merkado.
Gisultian na ni Cabriana si Mayor Eduardo Gullas bahin sa maong problema ug gipaboran siya niini human makita sa mayor nga makaayo kini.
Gibutyag sa konsehal nga ang income nila sa ihawan nga muabot og P2 milyones matag buwan makatabang aron makapalit dayon sila sa gikinahanglan sa Tabunok Public Market. (BANAT NEWS)