CEBU, Philippines - Nabangalan ang usa ka patay’ng lawas sa wala hiilhing lalaki nga naglutaw sa dagat sa habig sa Ouano Wharf sa Brgy. Looc sa Dakbayan sa Mandaue kagahapon sa hapon.
Si PO3 Rey Patigdas sa Presinto 5 sa Mandaue City Police Office (MCPO) niingon nga posibleng dili lumolupyo sa maong dapit ang patay’ng lawas kay walay nakaila niini. Hinoon adunay pipila ka tawo sa dapit ang nialigar nga sa buhi pa ang maong lalaki, ila kining nasigpatan nga misaka sa Vita Cargo Ship nga nag-angkorahe sa maong lugar aron mangayo og pagkaon pasado alas 5 sa buntag.
Sa paglabay sa pipila ka gutlo human nilarga ang maong cargo vessel, nasigpatan sa mga lumolupyo nga niambak ang maong lalaki sa dagat ug wala na igkita.
Gitataw ni PO3 Patigbas nga nakalarga na man ang maong cargo vessel wala na silay mapangutana sa mga crew alang sa pagkumpirmar nga nilayat kini gikan sa maong cargo vessel.
Sa pagbana-bana ni PO3 Patigdas, ang biktima anaa na sa 60 anyos ang panuigon, 5’5” ang pamarog, kasarangan ang gidak-on sa lawas, nagsul-ob og itom nga karsones, itom nga sapatos ug blue nga t-shirt. (BANAT NEWS)