2 bodega nasunog, P150T danyos

CEBU, Philippines - Naugdaw ang duha ka bodega nga nahimutang sa eskina Hernan Cortes sa Barangay Subangdaku, Dakbayan sa Mandaue atol sa sunog kagahapon sa buntag.

Si Senior Fire Officer 3 Arnold Lao sa Mandaue City Fire Station niingon nga unang nisilaob ang Suare Cube Construction nga gipanag-iya sa negosyanteng si Franklin Ola-ir ug dali kining nitapon sa tapad nga bodega nga gipanag-iya sa laing negosyante nga si Pioning Abrea.

Matud ni Lao nga ang sunog ilang gituohan nga naggikan ang mga pisik sa kayo sa nag-welding nga mga trabahante sa bodega ni Ola-ir.

Gipaubos sa Task Force Alpha ang sunog tungod sa mga construction materials nga nahimutang sulod sa bodega ni Ola-ir ingon man sa mga upholstery materials nga nahimutang sa bodega ni Abrea.

Hinuon gitataw ni Lao nga sa paglabay sa 10 minutos hingpit nila nga nakontrolar ang kayo.

Si Lao niingon nga ilang gibanabana ang danyos nga kapin sa P150,000 ug walay gikatahong naangol o napaso atol sa hitabo.  (BANAT NEWS)