CEBU, Philippines - Gilusad kagahapon ang mga kalihukan sa kapistahan sa patron sa Lungsod sa Argao nga si San Miguel Arkanghel nga gitawag og “Kasaulogan sa Argao 2016”.
Lakip sa gipaila ngadto sa mga sakop sa media ang bag-ong branding sa Argao nga mao ang “Doers of Change” kon DOC nga gipasiugdahan ni Mayor Stanley Caminero kinsa usa ka doctor.
Lakip sa kalihukan ang “Dalagang Argaoanon” nga lahi sa ubang beauty pageant diin gawas sa kaanyag ipaila usab niini ang kultura ug modesty ug wholesomeness sa Argaoanon nga magsul-ob sa hablon.
Ang hablon maoy karaan na nga hand-weaving industry sa lungsod panahon pa kaniadto sa mga Katsila ug sa nilabay’ng katuigan naghinay-hinay na kini og kawagtang.
Ang Cebu Technological University (CTU)-Argao Campus Extension Program nigama og pagtuon sa nagkawagtang na nga industriya sa lungsod.
Niadtong 2014, ang CTU ug ang lokal nga kagamhanan ubos sa pagtabang sa kagamhanan sa probinsiya, Department of Trade and Industry ug Department of Labor and Employment (DOLE) nibuhi sa hablon pinaagi sa repackaging sa industriya nga mapasundayag kini sa pagpahigayon sa kabag-ohan karon nga beauty pageant.
Kini ubos sa pagtabang sa renowned designer ug advocate sa mga hand-woven product nga si Dexter Alasas.
Si Dr. Jocelyn Concepcion sa CTU nagkanayon nga sa pagkakaron nagkinahanglan na sila og dugang mga manghablonay tungod kay nagkadaghan na ang ilang order. Nanghinaut siya nga matuman ang plano nga ang mga uniporme sa mga kawani sa gobiyerno gama na unya sa hablon aron mouswag pa ang industriya sa hablon sa Argao. (BANAT NEWS)