CEBU, Philippines - Dead on the spot ang usa ka aktibong polis nga naka-uniporme pa human kini nakigpinusilay sa mga polis atol sa buy- bust operation nga gihimo diha sa Lungsod sa Panglao, Bohol, pasado alas 10 sa nakalabay nga gabii.
Ang napatay nga polis mao si Police Officer 3 Ermun Butil nga nagpuyo sa Brgy. Napo Lawis, sa Alicia nga nadestino sa Lila Municipal Police Station, Bohol.
Sumala pa ni Police Officer 2 Renante Fucolan, imbestigador sa Panglao Police Station nga nahinabi sa Banat News nga ilang nahibaw-an nga nalambigit sa kalihokan sa drugas si Butil human mitug-an ang usa sa ilang mga dinakpan sa drug raid operation, pipila ka adlaw na ang nakalabay.
Sa selpon sa ilang usa ka dinakpan nagsige og text ang polis kabahin sa ilang negosyo sa drugas ug wala kini kalibutan nga nadakpan na diay ang iyang kakontak ug polis na ang iyang kaestorya.
Didto mihimo og plano ang kapulisan sa Panglao nga mohimo sila og buy-bust operation batok ni Butil ug kauban nila ang mga sakop sa Special Weapons and Tactics, Police Public Safety Company ug Tourist Police Unit.
Sa kalsada gihimo sa kapulisan ang transaksyon ni Butil apan nakamatikod kini nga polis ang iyang kaatubang maong kalit kini nga mibunot sa iyang .9mm pistol nga service firearm ug nahitabo gyud ang pinusilay nga nakaingon sa iyang kamatayon.
Narekober sa mga polis ang iyang service firearm ug walo ka nagkadaiyang putos sa gituohang shabu nga wala pa natino ang kantidad.
“Sakit tan-awon kay pareha gud nato na nga polis, pero kana man nga dalan ang gusto niya, wala ta’y mahimo ana,” saysay pa ni Fucolan. (BANAT NEWS)