Patrol cars ihatag nalang sa CITOM, barangay

CEBU, Philippines - Ipangapod-apod karong Lunes ang 15 ka Hi-Lux patrol cars nga alang unta sa kapolisan ngadto sa Cebu City Traffic Operations Management (CITOM).

Ang maong mga sakyanan wala gidayon paghatag ngadto sa kapolisan human sa pag-relibo sa mga opisyal sa kapolisan sa Dakbayan sa Sugbo.

Matud ni Nagiel Bañacia, public information officer sa Dakbayan sa Sugbo, nga si Mayor Tomas Osmeña daan nang niingon nga ang maong mga sakyanan iyang ipanghatag sa barangay ug sa CITOM.

Pito ka sakyanan ang madawat sa CITOM samtang walo usab sa mga barangay nga kaalyado sa mayor sama sa Talamban, Mabolo, Lahug, Capitol Site, Tejero, Guadalupe, Labangon ug Kinasang-an.

Matud ni Bañacia nga bisan og gikuhaan si Osmeña sa iyang deputation sa National Police Commission apan ang mga barangay dunay kaakuhan alang sa ilang peace and order hinungdan nga gihatagan sila sa mayor sa maong patrol cars aron makatabang sa ilang lugar sa pagpatuman sa kahapsay ug kalinaw.

Ang Siyudad sa Sugbo dunay 80 ka barangay apan walo lang niini ang nahatagan sa maong mga sakyanan.

Giangkon ni Bañacia nga dili gyud malikayan nga dunay makapangutana niini apan gihimug-atan niya nga ang mayor maoy nagpili sa maong mga barangay.

Hinoon ang mga patrol cars nga gipanghatag sa barangay mahimo ra usab nga magamit sa mga police stations depende na usab kun mohatag og pagtugot ang barangay kapitan.  (BANAT NEWS)