CEBU, Philippines - Hangtod karon wala pa nagpakita sa iyang mga labaw ang polis nga nag- viral ang video human naaktuhan nga nangulata og drayber sa trak diha sa tiilan sa Mandaue-Mactan Bridge pipila ka adlaw na ang nakalabay.
Si Chief Supt. Noli Taliño, director sa Police Regional Office-7 miingon nga kung dili gihapon mopakita si Police Officer 3 Renato Inot, pakasuhan kini ni Taliño og AWOL (absent without leave) ug insubordination.
Si Inot wa mipakita sa iyang labaw sa Mandaue City Police Office bisan gimandoan nga mo-report tungod sa reklamo sa duha ka trabahante sa usa ka air condition maintenance company nga gikulata sila niini kauban ang usa ka sibilyan.
Ang maong sibilyan nailhan na sumala pa ni MCPO Director Senior Superintendent Roberto Alanas. Matud pa ig-agaw kini ni Inot nga si Adelcos Alonzo, 45, iyang silingan diha sa Sitio Seabreeze, Brgy. Mactan sa Dakbayan sa Lapu-Lapu.
Ang mireklamo batok sa duha mao ang truck driver nga si Crispen Ricarte ug supervisor niini nga si Leonardo Orcullo, 28, matud pa nangasuko ang duha kay wala sila mopa-overtake.
Gi-alegar sa usa sa mga biktima mga pulos hubog ang mga suspetsado.
Matud ni Alanas pasakaan nila og illegal possession of firearms, grave threats ug physical injuries si Alonzo samtang gisusi na nila sa Camp Crame kung rehistrado kining firearm holder. Samtang kasohan og administratiba ug kriminal si Inot.
Ang gibuhat sa duha nakuhaan og video nga gi-post sa Facebook nga dali kaayong nag-viral ug daghan ang nakasaway niini.
“Talagang unbecoming ang actuation nang polis,” sigun pa ni Taliño pagkakita sa video.
Matud ni Taliño walay luna sa PNP ang susama og batasan sa usa ka polis ug nadismaya siya tungod kay anaa sa tungatunga sa programa paglimpyo sa organisasyon aron mapaduol sa katawhan ang mga polis dihang gibuhat kini ni Inot. (BANAT NEWS)