CEBU, Philippines - Karon nga kutob na lang sa Agosto 31 ang ihawan sa Siyudad sa Sugbo, giplanuhan unta kini nga himoong rehabilitation center alang sa mga nitahan nga mga nalambigit sa ilegal nga drugas subay sa Oplan Tukhang sa kapolisan.
Apan matud ni Dr. Alice Utlang, pangulo sa Department of Veterinary Medicine and Fisheries (DVMF), nga lisud kining matuman tungod kay nakita nila nga sagad sa mga gipaubos sa Oplan Tukhang dili gustong magpa-rehab nga boluntaryo.
Giingong gusto sa mga napaubos sa Oplan Tukhang moapil lang gyud sa out-patient rehab program sa siyudad maong kung dunay gustong mosulod sa rehabilitation center hatagan sila og ayuda ug i-refer sa pribadong rehab center.
Sa pagkakaron wala pa mahibaw-i kun unsay mahitabo sa ihawan sa Siyudad sa Sugbo apan ilang gipahibawo sa tanan nga sugod sa buwan sa Septiyembre wala nay ihawan ang dakbayan.
Hinoon sa pagsira sa ihawan dili mawagtangan og trabaho ang mga empleyado sa DVMF kay sigun ni Utlang nga ilaha na kining gibansay-bansay sa post-abattoir inspection ug ang ilang trabaho mao ang pagtabang sa mga meat inspectors sa nagkalain-laing merkado ug mga pribadong ihawan.
Panawagan ni Utlang sa tanan ilabi na niadtong mga magpaihaw nga sundon kun unsay nakalatid sa balaud sa National Meat Inspection Services ug kadtong mga mopalit og karne seguraduhon nga ang karne giihaw sa accredited nga ihawan.
Hinay-hinay na nga giuli sa DVMF ang mga ekipo sa ihawan ngadto sa General Services Office ug nisumiter na usab sila og report sa Department of Environment and Natural Resources labot sa closure order ug sa ilang clearing plan. (BANAT NEWS)