Nipuli kang Jaguar gipanid-an
CEBU, Philippines - Gisubay karon sa Police Regional Office-7 ang report labot sa mga high-valued target nga mga drug personalities nga nipuli sa pwesto sa napatay nga si Jeffrey “Jaguar” Diaz.
Matud ni PRO-7 Director, Chief Supt. Noli Taliño, nga kini ang sagad mahitabo sa grupo sa mga sindikato sa drugas.
“Normal ‘yan sa ilang sindikato na kapag may namamatay sa itaas, may papalit,” matud ni Taliño. Gani atol sa 888 News Forum sa Marco Polo Plaza kagahapon, ang bag-ong pangulo sa Philippine Drug Enforcement-7, Yogi Ruiz, nibutyag nga kapin pa sa napulo ka drug lords ang ila karong gisubay.
Matud ni Ruiz nga saktong operasyon ang ilang gihimo aron dili masayang ang gasto ug kahago sa gobiyerno sa pagpasaka sa kaso apan mabasura lang tungod sa mga sipyat.
“It will be dishonor sa atoa ug sa tawo,” matud ni Ruiz.
Dugang niya nga dili nila alang-alangon ang operasyon ug pagsuta sa tinud-anay nga kalihukan sa tawo nga ilang gi-monitor ilabi na nga bayolente gyud ang mahitabo.
Si Taliño nanawagan sa maong mga personalidad nga magpakita sa buhatan sa kapolisan kung dili kini gusto nga mamatay sa operasyon.
Samtang sa kabahin sa impormasyon nga gitug-an ni Franz Sabalones, ang ikaduhang most wanted drug lord sa Central Visayas ngadto ni PNP Chief Ronald Dela Rosa, si Taliño niingon nga kini usa ka dakung kalambuan ug daku nga bintaha karon sa ilang kampanya.
“Malaking bagay na ‘yan considering he is one of the top drug lords identified by the police,” matud ni Taliño.
Nanghinaut si Taliño nga tinud-on na ang saad ni Sabalones nga moundang na kini sa iyang ilegal nga negosyo.
Apan bisan sa iyang saad, ang kapolisan padayon gihapon nga maniid ni Sabalones.
Usa sa gitug-an ni Sabalones nga naghatagan kini og P200,000 matag semana ngadto na sa usa ka colonel nga polis sa rehiyon ug ngadto sab sa mga hepe sa kapolisan. (BANAT NEWS)
- Latest
