CEBU, Philippines - Tukuron pa ang usa ka Multipartite Monitoring Team una pa maablihan pagbalik ang Inayawan Sanitary Landfill sa Dakbayan sa Sugbo.
Kini maoy mag-monitor sa paglabay sa basura sa landfill nga gimando sa Environmental Management Bureau.
Si Konsehal Nida Cabrera, pangulo sa committee on environment and natural resources sa konseho sa dakbayan, niduol kang acting Mayor Margarita “Margot” Osmeña aron pagtukod sa MMT.
Usa sa gikinahanglan sa pagkuha sa environmental compliance certificate sa landfill mao ang environmental guarantee fund sa operasyon sa landfill.
“Actually pag-start ana naa gyud na siya ug ang City at that time naay gi-set aside nga guarantee pero wala sila ka-create og MMT so mao na ron ang bag-o,” matud ni Cabrera.
Nagsugod na kagahapon ang pagbuhat sa program of works para sa rehabilitasyon sa leachate pond tungod kay dili mahimo nga moabli sa landfill kung wala kini.
Giandam na sab ang site development plan nga ihatag nila sa Lunes para madetalye nila ang paggamit sa landfill. Matud ni Cabrera nga P5 milyones ang gikinahanglan nga budget sa pag-abli og balik sa landfill apan P1 milyon lang ang anaa sa reenacted budget karong tuiga.
Nipasalig usab siya nga pangitaan niya og paagi aron makakuha sa maong kantidad. Karong Lunes gikatakda nga moduso ang komitiba sa ilang proposal ngadto sa EMB-7.
Asoy usab ni Cabrera nga nagsugod na sila og pagpangita og ideal site para mamahimong landfill tungod kay ang sanitary landfill sa Inayawan molungtad na lang og duha ka tuig. (BANAT NEWS)