CEBU, Philippines - Gikombikto sa Lapu-Lapu City Hall of Justice ang usa ka lalaking gipasanginlang namugaw og mga menor de edad pipila na ka tuig ang milabay sa maong siyudad.
Ang gikombikto ni Judge Toribio Quiwag sa LLC- Regional Trial Court-Branch 27 mao si Gaudisio Gerra alyas “Tita Jojo o Jade.” Gisentensiyahan ni Quiwag og 20 ka tuig nga pagkabilanggo ug pabayaron kini og P1 million nga danyos human sa nahitabong pagbugaw sa upat ka batang babaye sa usa ka imnanan diha sa Maximo V. Patalinjug Avenue sa Brgy. Pajo sa miaging Disyembre 2009.
Si Gerra gidakop pinaagi sa entrapment operation nga gipahigayon sa sakop sa PNP Regional Anti-Human Trafficking Task Force-VII nga gipangulohan ni Police Senior Inspector Teresa Macatangay.
Base sa imbestigasyon sa RAHTTF-7, gibaligya ni Gerra ang upat ka babaye sa kantidad nga P1,000 matag usa alang sa pakighilawas.
Apan wala siya magdahom nga mga police decoy diay ang mga “customer” nga iyang gihatdan diha sa usa ka iladong motel sa mao gihapong barangay.
Si Gerra gikasohan og “Qualified Trafficking in Persons sa section 4 (a) ug (e) in relation sa Section 6 (c) sa Republic Act 9208 or Anti-Trafficking in Persons Act of 2003.
Matud sa desisyon sa korte ang trafficking usa ka “modern-day slavery at work” tungod kay ang mga biktima makasinati og eksploytasyon, pagpangilad, paglugos, prostitusyon, pisikal ug mental nga pag-abuso ug pugsanay nga pagpatrabaho.
Ang RAHTTF-7 nakig-alayon sa Department of Social Welfare and Development ug International Justice Mission atol sa pagpahigayon sa operasyon.
Matud ni Mariejo Sevilla sa IJM, ang mga na-rescue nga mga bata nabalik na sa ilahang tagsa-tagsa ka komunidad. (BANAT NEWS)