Gipusil tupad sa igsuong babaye

CEBU, Philippines - Gituohang kawatan ang gipusil patay sa Brgy. Tejero, Cebu City niadtong Martes sa gabii.

Si Divino Capahi, 29, patay human gipusil sa wala mailhing mga lalaki nga nagsakay og motor sa Sitio Doña Pepang sa maong barangay alas 10:30 sa gabii.

Ang biktima ug igsuong babaye nga si Barbi Capahi naglingkod-lingkod lang dihang kalit nihunong ang motorsiklo nga giluwanan sa duha ka lalaki nga nag-bonnet ug namusil gamit ang .45 caliber pistol.

Ang biktima naigo sa lain-laing parte sa lawas nga nakaingon sa iyang hinanaling kamatayon.

Matud ni SPO2 Ruth Violango, imbestigador sa homicide section sa Cebu City Police Office, nga posibleng gibawsan ang biktima kinsa napriso na kaniadto sa kasong pagpangawat ug pagpanglabni. (BANAT NEWS)