CEBU, Philippines - Pabor si Naga City Mayor Valdemar Chiong sa implementasyon sa curfew aron mapitol na ang mga batan-on sa pagsuroy-suroy sa lawom nang kagabhion.
Apan si Chiong nagkanayon nga mangita pa sab siya kun asa ibutang ang mga batan-on nga ma-rescue.
Iya usab susihon ang curfew ordinance nga naaprobahan niadtong 2008 aron mapun-an o maamendar sa paghatag og silot sa mga ginikanan sa mga bata nga madakpan.
Si Supt. John Clark, hepe sa kapolisan sa Siyudad sa Naga, niingon nga hapsay ug malinawon ang lugar nga iyang gialagaran apan kun ipatuman ang curfew, makig-alayon sila sa Department of Social Welfare and Development.
Nasayran nga ang kapolisan sa Dakbayan sa Talisay nagpanikad na sab sa ilang pagpatuman sa curfew apan ang problema kung asa nila dad-on ang mga ma-rescue nga mga batan-on.
Gawas niana, si Supt. Germano Mallari, hepe sa kapolisan sa Dakbayan sa Talisay, nibutyag nga nindot ang curfew kung adunay suporta sa mga opisyal sa lugar.
Si President-elect Rodrigo Duterte ang nipasiatab nga iyang ipatuman ang curfew panahon nga siya molingkod karong Hulyo 1. (BANAT NEWS)