CEBU, Philippines - Gisusi sa PNP Crime Laboratory ang mga armas nga nakuha atol sa operasyon sa kapolisan sa giingong sindikato sa ginadiling drugas sa Cawayan, Inabanga, Bohol.
Matud ni Supt. Romer Daguno, hepe sa Regional Crime Lab-7 nga una nilang himuon ang test for gun powder residue ug test firing or fire arms examination para mailhan ang serial numbers nga gi-tampered sa mga suspek ug ang pag-cross matched sa mga bala aron masuta kung nagamit ang mga armas sa laing krimen.
Kahibulungan usab nga nakuha gikan sa mga suspek ang usa ka M16 nga sagad lang i-isyu sa Armed Forces of the Philippines ug Philippine National Police.
Matud ni Police Regional Office-7 Director Patrocinio Comendador nga hayan ang maong armas gikawat o kaha gibaligya.
Gikataho nga dagku ang armas nga gipanggamit sa mga suspek sa pagpamusil atol sa raid sa kapolisan.
Samtang ang hepe sa Regional Special Operations Group (RSOG), Supt. Rex Derillo, nitataw nga nagkahinay na ang negosyo sa ginadiling drugas sa rehiyon ug namalhin na ang dagkung sindikato. (BANAT NEWS)