CEBU, Philippines - Patay ang electrician human natud-an og singot ang iyang gloves ug nakuryentihan samtang nag-tapping og kuryente sa dalan Minoza, Talamban, Dakbayan sa Sugbo alas 3:50 sa hapon sa niaging adlaw.
Ang namatay mao si Ricardo Gitamondoc, 40-anyos, minyo nga taga Malones, Dalaguete ug kasamtangang nagpuyo sa Dumlog, Talisay City ug nagtrabaho isip electrician sa Jodan Construction nga contractor sa Visayan Electric Company. Sigun pa ni PO1 Alcindor Suico nga nahinabi sa Banat News nga nakuryentihan ang biktima tungod kay natud-an og singot ang gloves samtang nag-tapping og kuryente ug nabantayan na lang sa mga kauban nga nikirig.
Dali nga nanawag og tabang ang mga kauban sa biktima ug daling gidala sa North General Hospital apan nakabsan kini sa kinabuhi human sa pipila ka gutlo. (BANAT NEWS)