CEBU, Philippines - Usa ka giingong hitman sa usa ka grupo nga namaligya og ilegal nga drugas ug nalambigit ‘sab sa pagpanulis dinhi sa Dakbayan sa Sugbo ang mitahan sa iyang kaugalingon sa usa ka opisyal sa Cebu City Police Office kay gusto na nga magbag-o sa iyang kinabuhi.
Si Raymart Conahap, 26, nga taga Sitio Ponce, Brgy. Carreta ning Dakbayan sa Sugbo, mitahan sa iyang kaugalingon sa hepe sa City Intelligence Branch, Supt. Michael Bastes niadtong nakalabay nga adlaw. Si Conahap adunay kaso nga murder.
Matud pa ni Bastes nga 15 anyos pa lang si Conahap nalambigit na kini sa pagpanulis sa mga PUJs dinhi sa siyudad.
Gani gipakita ni Bastes sa Banat News gikan sa iyang mga karaan nga listahan sa tuig 2008 nga aduna na’y daghang kaso nga robbery ug kasong attempted murder nga giatubang si Conahap.
“Patrolman pa ko sa una involved nani siya, pirmi mi magginukuray ani sa una,” matud pa ni Bastes.
Apan sa nakuha nga impormasyon ni Bastes iyang nasayran nga nalambigit usab si Conahap sa drugas ug nagamit usab kini nga hitman.
Ang warrant of arrest ni Conahap migawas human iyang napatay ang iyang silingan niadtong 2014.
Sa paghinabi sa mga tigbalita ni Conahap kini miangkon sa kasong pagpatay nga iyang giatubang apan mihimakak sa pasangil nga siya hitman sa sindikato sa drugas. Sumala pa ni Conahap nga nakahuna-huna kini nga motahan sa iyang kaugalingon kay misalig siya ni Bastes nga iyang gihulagway nga usa ka tarong nga polis.
“Gituyo naku ni surrender kay pamilyado nako, di nako gusto og labad, gusto ko mogawas ko puhon normal na ang pagpuyo,” dugang pa ni Conahap. (BANAT NEWS)