CEBU, Philippines - Walay piyansa sa usa ka tawo nga nadakpan sa Barangay Catarman, Cordova tungod sa pagpadagan og suyopanan og shabu sa ilang dapit.
Si Police Officer 2 Esmail Limpangog sa Cordova Police Station niila sa akusado nga si Eleasar Baguio, 39-anyos, minyo nga nagpuyo sa maong dapit.
Matud ni Limpangog nga gironda sa kapolisan ang suyopanan niadto pang tuig 2015 diin niadtong higayuna adunay mga nadakpan apan nakaeskapo si Baguio.
Gipasakaan og kaso ang mga nadakpan lakip si Baguio.
Si Baguio nga nawagtang sa maong lugar sa niaging tuig human sa iyang pag-eskapo ang nagtuo nga nakalimtan na sa kapolisan ang kaso hinungdan nga nipauli kini sa ilang panimalay hinungdan sa iyang pagkasikop.
Samtang nagtingkagol sa selda sa Talamban Police Station ang 19-anyos nga lalaki kinsa nadakpan sa buy-bust operation sa Hillside Talamban pasado alas 12 sa nakalabay nga kadlawon.
Ang dinakpan giila nga si Mark Kevin Flores, ulitawo nga taga Barangay Budlaan, Dakbayan sa Sugbo.
Ang hepe sa Talamban Police nga si Sr. Insp. Perceval Miasco niingon nga anaa sa ilang listahan isip drug personality si Flores nga iyang gihulagway nga level 2 drug pusher.
Narekober sa mga polis gikan sa suspek ang 10 ka gagmay nga pakete ug usa ka dakung putos sa gituohang shabu nga kantidad og kapin sa P10 mil.
Nadakpan usab sa checkpoint sa Liloan ang usa ka tawo nga nagdala og duha ka paketeng shabu sa dalan White Rose, Barangay Yati.
Ang nadakpan giila nga si Vic Andrew Barosa Villamor, 23, taga Sitio Lourdes, Poblacion, Liloan.
Ang suspek napakyas sa pagpakita sa iyang lisensiya sa pagmaneho og motorsiklo hinungdan nga girekisa ug nakuha ang gidala nga shabu. (BANAT NEWS)