2016 Elections malampuson–Comelec
CEBU, Philippines - Gihulagway ni Comelec -7 director Jose Nick Mendros nga lapas 90 porsiyentong malampuson ang pagpahigayon sa Mayo 9 nga piniliay.
Wala kini masiyento porsiyento tungod sa matud pa mga nasinating problema bisan sa gihimong pagpangandam, apan gikonsiderar gihapon nilang malampuson ang tanan.
Si Mendros namahayag niini usa ka adlaw human sa proklamasyon kanila ni president-elect Rodrigo Duterte ug vice president-elect Leni Robredo sa Kongreso.
Si Mendros nagpasalamat sa maayong kooperasyon sa PNP (Philippine National Police) ug sa AFP (Armed Forces of the Philippines) nga maoy main factor sa kalampusan sa eleksyon.
Matud pa niya nakatabang usab ang duha ka adlaw nga forums ug workshop aron makapangandam sila sa bisan unsang sitwasyon nga posibleng mahitabo atol sa eleksyon.
“Because of that, the security officers were able to respond every contingency na mangyayari every polling stations,” matud pa ni Mendros kinsa nidugang nga kung mahimo dili na kinahanglang magdeklarar pa og EWAs (election watch list areas ) sa mga lugar kun walay dakong kasamok.
Gibutyag ni Police Senior Supt. Armando Radoc chief of the Police Regional Office 7 Operations and Plans Division sa Post Election Assessment Conference kagahapon sa buntag miingon nga dako og natabang ang pagbansaybansay sa mga kapulisan alang sa election duties.
Giingong adunay 5,802 ka mga polis ang gi-deploy sa 4,760 ka mga polling precincts sa rehiyon. Samtang miabot og 24,951 checkpoint operations ang ilang nahimo nga niresulta sa pagkasikop sa 323 ka mga tawo ug 352 ka mga ilegal nga armas ang nasakmit.
Dako usab og natampo sa kalampusan ang pagpahigayon og Peace Covenants, Taping of Firearms, Safe keeping of firearms, Peace Dialogues sa mga kandidato ug paggamit sa mga force multipliers.
Si Chief Supt. Patrocinio Comendador, director sa Police Regional Office-7 misusama paghulagway sa nakalabay nga eleksyon nga usa ka pelikula ug ang bida mao ang kapolisan nga angay pasidunggan. (BANAT NEWS)
- Latest
