Dengue posibleng mosaka tungod sa La Niña
CEBU, Philippines - Gipanglantawan sa Regional Epidemiology and Surveillance Unit (RESU) sa Department of Health (DOH)-7 nga mas mosaka pa ang kaso sa dengue tungod sa nagsingabot nga pagsulod sa ting-uwan.
Matud ni Rennan Cimafranca, pangulo sa RESU-7 ang dagan sa panahon maoy nag-una nga rason nganong taas ang kaso sa dengue karong tuiga.
Base sa datos sa ahensiya misaka og 159 porsiyento ang gidaghanon sa kaso ning tuiga itandi sa tuig 2015.
Gikan sa buwan sa Enero hangtud sa buwan sa Mayo anaa na sa 5,557 ka kaso sa dengue itandi sa miaging tuig nga anaa lang sa 2,149 ka kaso sa susamang mga buwan diin 43 ang patay taas kini itandi sa milabay nga tuig nga naa lang sa siyam.
Nasayran nga nag-una gihapon ang Dakbayan sa Sugbo sa pinakadaghan og kaso gisundan dayon kini sa Mandaue City, Toledo City, Lungsod sa Balamban, Lapu-Lapu City, Liloan, Talisay City, Consolacion, Lungsod sa Cordova ug Siyudad sa Carcar.
Gibutyag sa RESU nga sagad sa mga naigo sa sakit nga dengue nag-edad og 6-anyos ngadto na sa 10-anyos.
Nagpadayon hinuon ang pag-monitor sa RESU sa mga lugar nga dunay mga kaso apan giklaro ni Cimafranca wala silay natala nga nag-outbreak sa dengue sa rehiyon.
Kahinumduman nga sa miaging tuig, tulo ka lugar ang gipaubos sa outbreak nga naglangkob sa Guihulngan ug Canlaon sa Negros Oriental ug ang lungsod sa Daanbantayan. (BANAT NEWS)
- Latest
