CEBU, Philippines - Kung giaprobahan sa Provincial Board ang resolusyon ni Bokal Arleigh Sitoy nga nagpabor sa curfew sa mga minor de edad, wala kalusot ang laing resolusyon nga nagsuporta sa pagpabalik sa death penalty.
Atol sa sesyon kagahapon, 11 ang nisupak batok ni Sitoy kinsa nag-inusara nga nanalipod sa iyang resolusyon. Gipadayag ni Sitoy nga ang death penalty alang lang sa mga nakahimo og heinous crimes.
Mismo si Bise Gobernador Agnes Magpale niapil sa debate hinungdan nga si Bokal Julian Daan ang nilingkod isip presiding officer alang sa maong hisgutanan.
Si Magpale nagkanayon nga ang death penalty dili makapugong sa krimen sa nasud ug iya kining gihulagway nga anti-poor. Matud ni Magpale nga adunay pipila nga makadaug sa kaso tungod sa kamaayo sa nakuha nga abogado samtang ang uban walay makadepensa ilabi na ang mga kabus.
Si Bokal Grecilda Sanchez nagkanayon usab nga dili pa andam ang justice system sa nasud nga giuyonan usab ni Bokal Sun Shimura kinsa maoy chairman sa PB committee on peace and order. (BANAT NEWS)