CEBU, Philippines - Naghayang samtang nagkadugo nang naabtan sa kapulisan ang lawas sa usa ka lalaki sa sulod sa balay sa Block IV Brgy. Sawang Calero sa Dakbayan sa Sugbo kagahapon sa kaadlawon.
Ang biktima giilang si John Ryan Arnaiz, 21, residente sa Magsaysay St. Brgy Sawang Calero samtang ang suspek mao ang iyang suod nga amigo si Jack Jones Abella Cabarrubias, 21.
Si Arnaiz nakaangkon sa samad pinusilan sa liog hinungdan sa dali niyang kamatayon.
Giingong paghuman sa pagpamusil sa suspek dali kining miikyas ug nasugatan ang ig-agaw sa biktima nga si Mark Laurina ug giingnan kini nga patabangan si Arnaiz kay iyang napusilan.
Dali dayung mitawag og pulis ang ig-agaw sa biktima ug nidagan sa maong balay.
Matud pa ni SPO2 Rommel Bancog nga nakahinabi sa Banat News nga nakabsan na sa kinabuhi ang biktima pag-abot nila sa maong balay.
Base sa imbestigasyon, suod nga managhigala ang duha, apan gisusi pa kun unsay hinungdan nganong napusilan sa suspek ang higala. Ang suspek padayon pang gipangita sa kapolisan. (BANAT NEWS)