Basura sa baybayon sa Pooc gipanguha
CEBU, Philippines - Nipahigayon og coastal clean-up ang Provincial Environment and Natural Resources Office sa Barangay Pooc, Dakbayan sa Talisay kagahapon sa buntag.
Matud ni Lovella Nakayama, administrative officer-designate sa PENRO, nga kini subay sa gisaulog nga Month of the Ocean.
Gisalmutan ang kalihukan sa mga representante sa nagkalain-laing departamento sa Kapitolyo lakip na ang legislative department ug military.
Nisalmot usab ang mga mananagat sa Talisay, mga residente sa Pooc ug mga kawani sa City Agriculture Office.
Bisan nag-uwan-uwan, wala kini nakapugong kanila nga manglimpyo sa baybayon.
Sa ilang pagpanglimpyo adunay putos sa mga kendi sa kilid-kilid sa balay ug tindahan nga duol sa baybayon, mga basura nga gipundo kilid sa kahoy ug nasagol sa mga tagak nga dahon nga daw nahimo sama na sa “mini dumpsite”.
Nakuha sa pagpanglimpyo ang 1,184.5 ka kilos sa basura gikan sa baybayon ug sa mga duol nga balay niini. Sumala pa ni Nakayama nga sunod semana adunay follow-up nga pagpanglimpyo subay sa ilang Information Education Communication (IEC) campaign.
Malaumon si Nakayama ug ang PENRO nga mahimo silang ehemplo ilabi na sa mga tawo nga nagpuyo sa lugar nga maaghat sa pagpanglimpyo sa baybayon. (BANAT NEWS)
- Latest
