103 ka saba kaayong tambutso gisakmit

CEBU, Philippines – Gikompiskar sa kapulisan sa Dakbayan sa Mandaue ang mga tambutso sa mga motorsiklo nga saba kaayo ug duna usab silay gi-impound kay way rehistro ug ang mga drivers walay lisensiya.

Gihimo nila kini sa gipahigayon nga One Time Big Time Oplan Sita sa tulo ka barangay sa dakbayan.

Nagkanayon si Senior Superintendent Jonathan Cabal, OIC City Director sa Mandaue City Police Office (MCPO) pinaagi sa pakigtambayayong sa Highway Patrol Group (HPG) gihimo nila ang operasyon sa Brgy. Tawason, Casili ug Canduman.

Miabot sa 103 ka mga ‘modified tambutso’ nga saba kaayo ang ilang gisakmit ug naa sa 40 ka mga motorsiklo ang ilang gi-impound apan ang 12 niini nauli na ngadto sa tag-iya human nakapakita   og dokumento ang mga tag-iya.

Gawas sa Mandaue, ang siyudad sa Sugbo mipahigayon na usab sa maong operasyon.

Sigon ni Chief Inspector Wildemar Tiu, pangu sa Mabolo Police Station nga nahinabi sa Banat News niadtong miaging semana ilaha nang gisugdan ang ilang One Time Big Time Oplan Sita didto sa Brgy. Busay ug sa Sudlon sa Brgy. Lahug siyudad sa Sugbo.

Kapin sa 80 ka mga tambutso ang ilang nakompiskar ug duna usab silay mga motor gi-impound kay walay lisensiya.

Gihangyo ni Tiu ang mga motorista nga saba kaayo og tambutso nga mas maayong boluntaryo nila kining tangtangon ug ibalik ang orihinal aron dili ma-isyuhan og ticket ug makamulta. - /EIM