PRO-7 mokiha sa mga tambalanan

CEBU, Philippines - Mibahad ang direktor sa Police Regional Office-7 nga modangop sa korte ug mopasaka og kaso batok sa mga tambalanan dinhi sa Sugbo nga dili mopasulod sa mga imbestigador sa polis aron mohimo sa ilang trabaho. Kini ang gitug-an ni Chief Superintendent Patrocinio Comendador Jr. sa mga tigbalita human ang mga sakop sa Homicide Section sa Cebu City Police Office ang mipabuhagay sa ilang lain na usab nga pagkadismaya sa pamunoan sa Vicente Sotto Memorial Medical Center (VSMMC).

Kini human wala sila pasudla sa maong tambalanan aron unta mohimo og imbestigasyon sa kaso sa pagpamusil nga ang biktima nalandig sa maong tambalanan.

Dili lang kadto ang unang higayon nga nagkaproblema ang mga imbestigador sa maong tambalanan, apan susama gihapon nga kasinatian ang gitug-an sa ubang mga polis batok sa ubang mga tambalanan sa mga silingan nga dakbayan ug kalungsoran.

Matud pa ni Comendador nga sa umaabot nga adlaw ilang plano nga mohimo kini og “dialogue” dili lang sa VSMMC apan sa tanan nga tambalanan dinhi sa Sugbo aron iyang mapasabot kun unsa ka mahinungdanon sa kasulbaran sa mga krimen ang pagsulod sa ilang tambalanan.

Apan kung sa gihapon magmagahi ang tambalanan ug kun dili gihapon pasudlon ang mga polis mopasaka gayod sila og kaso nga “obstruction of justice.”

Matud ni Comendador nga dugay na kini nga problema. (BANAT NEWS)