CEBU, Philippines - Simbahan andam makig-diyalogo ngadto ni presumptive president Rodrigo Duterte may kalabotan sa isyu sa death penalty, apan giklaro niini nga wala mausab ang baruganan sa simbahan batok sa silot kamatayon.
Si Archbishop Jose Palma sa Archdiocese of Cebu sa dihang gikahinabi sa mga tigbalita atol sa ika- 432nd anniversary sa San Nicolas de Tolentio Parish mipadayag nga sagrado ang kinabuhi sa tawo ug kini ang hanig sa Simbahan sa ilang baruganan sa pagpakigbatok sa death penalty.
Sumala pa ni Palma, dili garantiya nga makapawagtang sa krimen ang pagpahamtang og silot sa kamatayon nga maoy giduso ni Duterte ilabi na sa mga linoog nga krimen.
Dugang pa sa Arsobispo walay si bisan kinsa o usa ka tawo nga mahimomg mohukom, pagpusil o pagpatay sa usa ka tawo tungod kay gikinahanglan nga ipaagi og ‘due process.’
Gibati og kabalaka ang arsobispo sa gipamulong ni Duterte nga ‘shoot to kill’ sa mga tawo nga mosukol sa balaod.
Duna say pagduhaduha si Palma sa pagtanyag ni Cebu City mayor-elect Tomas Osmeña og ganting salapi sa mga pulis nga makapatay og durugista.
Wala na hinuon modetalye si Palma kung personal ba nila pakigkitaan si Duterte o ipaagi ba sa sulat. (BANAT NEWS)