Rama suspenso na

CEBU, Philippines - Gisuspenso na gyud kagahapon sa Department of the Interior and Local Government (DILG) sila si Mayor Michael Rama, Vice Mayor Edgardo Labella ug ang 12 ka konsehal sa dakbayan sa Sugbo.

Ang Malacañang maoy mimando nga suspensohon ang maong mga opisyal human namatud-an sila nga sad-an sa kasong Abuse of Authority tungod sa pagtugot nga mahatagan og tag P20 mil nga calamity cash assistance ang tanang opisyal ug kawani sa City Hall niadtong 2013.

Gitudlo sa DILG si Konsehal Margarita “Margot” Osmeña nga maoy molingkod pagka acting mayor hangtod sa udtong tutok sa Hunyo 30, dungan sa pag-asumir na sa katungdanan ni Mayor-elect Tomas Osmeña nga iyang bana.

Nanumpa si Margot sa iyang katungdanan atubangan ni Cebu City Prosecutor Leceria Ravillas ug miisyu dayon og direktiba sa mga department heads nga i-secure ang kabtangan sa City Hall.

Gimandoan ang mga department heads nga dili usa mopagawas og bisan unsa nga bayad hangtod nga masusi niya nga ang bayranan kumpleto sa dukomento, gawas sa sweldo sa mga kawani.

Gimando usab ni Osmeña ang pagpauli sa tanang sakyanan nga giisyu ngadto sa mga opisyal ug kawani sa City Hall, apil na ang mga giisyu sa mga opisyal sa barangay aron maimbentaryo. Matud ni Osmeña nga motudlo siya og transition team alang sa hapsay nga pagturn-over sa administrasyon ngadto sa iyang bana nga si mayor-elect Tommy Osmeña karong Hunyo 30. Wala maapil si Margot sa mga gipasuspenso sa Malacañang kay siya ug si Konsehal Lea Japson wala modawat sa calamity cash assistance.

Miabot og P84 milyones ang nagasto sa paghatag og calamity assistance nga gihulagway sa Commission on Audit nga kwestyonable.

Si Mayor Rama wala sa iyang opisina diha nga si DILG Regional Director Rene Burdeos mi-serve sa suspension order.

Si Vice Mayor Labella miingon nga andam siya nga magpasuspenso, apan mopadayon gihapon siya sa pagkuwestyon sa suspension order ngadto sa Court of Appeals.

“The law may be harsh but since it is the existing law, we have to abide by it but we have to question certain lapses,” matud ni Labella.

Ang mga staff ni Rama nanghipos na sa kagamitan sa mayor aron ibakante ang opisina.

Apan ang incoming mayor dili moukopar sa opisina ni Rama kay adto ra siya sa daan niyang opisina sa ikawalo nga andana. (Merybeth I. Fernandez ug Aaron Sagaoinit, CNU Intern/RUB)

Duha ka tulisan napusilan

Duha ka mga gipasanginlang tulisan ang nalandig sa tambalanan ug usa nila ang kritikal ang kahimtang human napusilan sa usa ka polis sa dihang kini misukol diha sa Archbishop Reyes Avenue ning Dakbayan sa Sugbo kagahapon sa buntag.

Sa impormasyon nga gihatag ni Police Officer 3 Winston Ybañez, imbestigador sa Homicide Section sa Cebu City Police nga nahinabi sa Banat News iyang giila ang duha ka mga tulisan nga sila si Nestor Buenavente, taga Brgy. Inayawan ug Armand Dela Cerna, taga Brgy. Cogon sa Dakbayan sa Ozamis.

Ang maong impormasyon nakuha sa kapulisan gikan ni Buenavente diha sulod sa tambalanan. Ang drayber sa gisakyan nga motorsiklo sa mga suspetsado nakasibat atol sa pinusilay ug kini giila ni Buenavente nga gikan usab sa dakbayan sa Ozamis.

Sumala pa ni Superintendent George Ylanan ang deputy chief for operations sa Cebu City Police Office nga unang nahitabo ang pagpanulis diha sa Gorrordo Avenue human gitulis sa mga suspetsado ang usa ka pasaheroan nga O4C paingon sa Plaza Housing.

Usa sa mga biktima sa tulis nga si Cristita Barbosa, 65, taga Nivel Hills, sa Brgy. Lahug nga nahinabi sa Banat News nagkanayon nga misakay ang mga tulisan  samtang naghunong ang ilang gisakyan tungod sa “stop” signal sa traffic light.

Sumala pa ni Barbosa nga Tagalog ang inistoryahan sa mga tulisan ug gihimulbolan kini sa iyang dala nga bag, grocery lakip ang laing duha niini ka mga kauban nga pasahero.

Human sa pagpanulis dali nga nanganaog ang duha ug misakay sa motorsiklo nga nagpaabot kanila.

Apan gidemalas ang duha kay nakabantay sa komosyon si Police Officer 3 Julius Regis, sakop sa City Intelligence Branch (CIB) sa Cebu City Police Office nga nagsakay og motorsiklo paingon na unta mopauli.

Dihang nangutana kini sa mga pasahero gitug-anan siya nga gitulis sila sa duha  maong iyaha dayon silang gigukod ug iyang naabtan sa may Archbishop Reyes kay naipit kini sa trapiko.

Didto na giduol ni Regis ang mga tulisan ug nagpaila nga polis, apan si Dela Cerna giingon nga unang mibunot og armas hinungdan nga gipusil kini dayon ni Regis.

Gipusil usab ni Regis si Buenavente aron unta kini ma-neutralize apan nakadagan kini ug nakasakay og jeep paingon sa Talamban ug ang drayber sa motorsiklo nakapabulhot og padagan.

Nadakpan sa mga sakop sa Mabolo Police si Buenavente sulod sa usa ka subdivision sa Brgy. Banilad human kini misulod sa usa ka balay ug nagtago. Apan ang guwardiya sa maong subdivision ang dali usab nga mitawag og polis hangtod nga kini nadakpan.

Ang hepe sa Mabolo Police nga Chief Inspector Wildemar Tiu miingon nga stabbing incident ang unang nadawat nila nga report hangtod nga ilang nasayran nga usa diay sa mga tulisan ang nagtago sulod sa maong subdivision.

Si Dela Cerna gidala sa Perpetual Soccour Hospital tungod sa naangkong samad pinusilan sa liog ug buko-buko samtang gidala usab sa Vicente Sotto Memorial Medical Center si Buenavente nga nakaangkon og pinusilan sa abaga.

Nakuha gikan ni Dela Cerna ang .45 caliber pistol samtang usa ka 9mm pistol usab ang nakuha gikan ni Buenavente.

Samtang gipasalamatan sa officer in-charge sa CCPO, Sr. Supt. Benjamin Santos si Regis nga mitubag sa maong alarma bisan og wala na kini sa duty.

“If you look at this, these is exemplary no. We would like to recommend for his promotion,” matud pa ni Santos.

Gipasabot usab ni Santos nga usa sa ilang gisubay karon kung aduna pay kaubang grupo ang mga suspek ilabina nga ang duha gikan sa Dakbayan sa Ozamis.

Gitug-an ni Santos nga nakadawat na usab sila og report nga kadtong mga tulisan nga nakatulis sa Dakbayan sa Carcar ang nagplano usab manulis dinhi sa dakbayan.

Adunay dili kompirmadong report nga nadawat ang Banat News kagabii nga nakabsan sa kinabuhi ang usa sa mga suspek.

Sa laing bahin, duha ka armadong lalaki nga nagsakay og motorsiklo ang nitulis sa usa ka tindahan sa  merkado publiko sa  Sitio Cantecson, Brgy. Gairan, Dakbayan sa Bogo sa miaging gabii ug nasakiyo ang mokabat sa P20,000 nga halin niini. Si Police Officer 3 Ryan Alarde sa Bogo City Police Station miila sa tindahan nga gitulis nga mao ang Merly Store nga gipanag-iya sa negosyante nga si Merly Barte, 43 anyos nga  nagpuyo sa maong dapit.

Sumala pa nga gitionan sa usa sa mga tulisan ang kahera nga si Gretchen Alexander Maurinliro, 29, ug gikuha ang belt bag niini nga gisudlan sa halin ug pagkahuman nidagan sa gawas diin nagpaabot ang kauban sa motorsiklo ug daling mipalayo sa lugar. (BANAT NEWS)