Ocean’s Month giobserbar karon

CEBU, Philippines - Paghingusog sa Department of Environment and Natural Resources (DENR) labot sa pagprotehir sa kalikupan lakip na ang kadagatan, ang buwan sa Mayo gipahinungod alang sa paghatag og dugang pagtagad sa kadagatan kon Month of the Ocean.

Nasayran nga sagad ang summer season ilabi sa buwan sa Mayo mao ang tigpangitlog sa mga isda ug usa kini sa padayon nga giprotehian karon sa nagkadaiyang ahensiya sa gobiyerno dinhi sa rehiyon ug sa silingang mga rehiyon mao ang Tañon Strait Protected Seascape (TSPS).

Ning pagsaulog sa DENR, DA, BFAR sa Month of the Ocean dala nila ang tema nga "Buhay Dagat, Buhay Natin."

Usa sa ilang gitudlo nga grabe nga giabuso  mao ang Tañon Strait diin daghang commercial fishing boats ang manguha og mga isda sulod sa dugay nga panahon hinungdan nga menus na ang makuha sa mga yanong mananagat.

Nagkanayon si Mario Aragon, pangu sa Conservation and Development Division sa DENR-7 usa sa gipanghambog sa Kabisay-an kining presensiya sa mga dolphins ug whales gani 14 sa 29 ka mga species niini ang makita sa Pilipinas ug sagad naa sa Tañon Strait.

Ang Tañon Strait ang pinakadakong Marine Protected Area sa nasud ug major fishing ground kini.

Niadtong Mayo 1998 pa kini gideklarar nga Protected Area nga naglangkob sa pito ka siyudad, 35 ka munisipalidad ug 298 ka mga coastal barangays sa Sugbo, Negros Oriental ug Occidental.

Giangkon ni Forester Percival Fiel sa DENR duna gyu’y lokal nga kagamhanan ang wala magtagad pagsikop sa mga illegal commercial fishing vessels ilabi na ning naghinangat nga piniliay.

Tungod usab sa nagkalain-laing balaod o ordinansa nga gipatuman sa barangay, munisipyo ug siyudad hinungdan nga gipaningkamutan nila karon nga mahusay ug makab-ot ang kasabutan uban sa BFAR.

Sukad sa niaging tuig hangtod ning tungura, adunay upat ka mga fishing vessels ang nasikop tungod sa ilegal nga pagpanagat  ug 55 ka mga tawo ang napasakaan na og kaso sa DENR. (BANAT NEWS)