Lolo naligsan sa kagawad patay

CEBU, Philippines - Nakabsan sulod sa tambalanan ang usa ka 85 anyos nga Lolo human kini nadasmagan sa usa ka multicab nga gimaneho sa usa ka konsehal sa barangay diha sa Bawo, Lungsod sa Sogod sa nakalabay nga hapon.

Giila ang biktima nga si Leoneves Boter, nagpuyo sa maong dapit kinsa namatay sulod sa Juan Dosado Memorial Hospital.

Samtang ang drayber sa multicab giila nga si Dario Dinopol, 61, minyo ug kagawad sa barangay Bagatayam sa maong lungsod.

Matud pa ni Police Officer 1 Ivan Rey Davidon, desk officer sa Sogod Police nga nahinabi sa Banat News nga kalit lang mitabok sa kalsada ang biktima hinungdan nga nadasmagan kini sa multicab.

Dali pa unta kini nga gikarga sa sakyanan ug gihatod sa tambalanan apan paglabay sa usa ka oras nakabsan kini sa kinabuhi.

Hinoon gitug-an ni Davidon nga kagahapon sa alas 2:40 sa hapon ilaha ra usab nga gibuhian ang konsehal human sila nagkasinabot sa pamilya sa biktima. (BANAT NEWS)