P1.2M shabu nasakmit

CEBU, Philippines - Nikabat ngadto sa dili mominus P1.2 milyones nga shabu ang nasakmit sa sakop sa Regional Anti-Illegal Drugs Special Operation Group (RAIDSOTG)-7 sa gipahigayon nga buy-bust operation kagahapon sa hapon sa Purok 4, Lower Kamputhaw, Dakbayan sa Sugbo.

Nasikop sa maong operasyon si Roger Balmori,48 , nga maoy subject sa operasyon nga gipahigayon pasado alas 3 sa hapon. Nakuha gikan kaniya ang 105 gramo nga shabu.

Matud ni Balmori nga tungod sa kapobrehon mao nga nisulod siya sa maong negosyo aron masustentohan ang iyang pamilya.

Gawas kang Balmori apil nga nasikop mao si Kharleene Mariñas, 26, tungod kay adunay nakuha nga upat ka paketeng shabu gikan kaniya.

Apan si Mariñas mihimakak niini ug nangangkon nga paingon siya pauli sa ilang balay nianang tungora dihang kalit siyang gisikop sa mga polis. Matud niya, igo ra siyang nilabay sa maong dapit. Si Senior Inspector Henrix Bancoleta nagkanayon nga dugay nilang gipanid-an si Balmori sa wala pa gihimo ang raid.

Si Barangay Kamputhaw Kapitan Bobir Bedrigo Lequigan nagkanayon nga wala siya makaila kang Balmori ug wala siya’y kasayoran sa illegal  niining negosyo.

Samtang usa ka Teodoro Moral Batulan, 64, ang nadakpan sa buy-bust operation sa kapolisan diha sa lungsod sa Medellin.

Sumala pa nga taga Poblacion sa Dakbayan sa Danao ang suspek apan giingong mipalapad unta sa iyang operasyon sa drugas diha sa Poblacion, Carmen  apan didto kini nadakpan.

Si Police Officer 3 Mariano Aloba sa Medellin Police Station miingon nga nakuhaan og 11 ka gagmay nga paketeng shabu atol sa buy-bust operation  ang suspek.

Samtang laing duha ang nadakpan sa managkalahing dapit sa Lungsod sa Borbon nga ang usa niini ang naaktohan kauban sa grupo nga mga lalaki nga nagsuyop og shabu sulod sa usa ka payagpayag alas 6 pasado ang takna sa miaging gabii.

Si Police Officer 3 Owen Baticuang sa Borbon Police Station miila sa nadakpan nga mao si Ermo Casas Hatamosa, 28, nagpuyo sa maong dapit.

Nag-iyahay sa pagpanagan ang nagtapok nga mga lalaki nga nagsuyop og shabu apan si Hatamosa wala kaipsot.

Ang laing nadakpan mao si Francisco Montejo Banguero,41 anyos, nga nagpuyo sa Candarohan, Lungsod sa Borbon nga nakuhaan usab og tulo ka paketeng shabu. (BANAT NEWS)