CEBU, Philippines - Pito ka mga tawo ang nadakpan sa mga sakop sa Philippine Drug Enforcement Agency Regional Office 7 (PDEA-7) diha sa Sitio Villagonzalo II, Brgy. Tejero ning Dakbayan sa Sugbo niadtong nakalabay nga adlaw.
Pasado alas-2 sa nakalabay nga hapon gironda sa mga sakop sa PDEA-7 ang usa ka drug den sa maong dapit pinasikad sa search warrant nga giisyu sa korte, uban sa kamanduan sa direktor sa PDEA-7 Ronald Allan Ricardo.
Atol sa maong pagpang ronda nadakpan ang ilang target nga si Tata Dequitos, alyas Wawa o naila usab sa pangalan nga Felix Borla Jr., 23. Lakip sa nasikop sila si Rangie Macarat Resomadero, 23, taga MJ Cuenco Avenue, Cebu City; Rendo Rubio Plenos, 31, taga Dipolog City; Marcial Milana Carbonilla, 32, sa Villagonzalo II, Rolando Salazar Quiño, 39; Armando Aroa Monsalud, 45, ug Romy Muaña Formentera, 39.
Narekober sa mga operatiba ang 108 ka mga pakete sa gitohoang shabu nga mitimbang og 50 gramos nga dunay street value nga P150 mil, drug paraphernalia ug cash nga P1, 280.
Gitanggong na sa selda sa PDEA-7 ang mga suspetsado nga gikatakdang pasakaan og tukmang kaso. (BANAT NEWS)