Mga mag-uuma sa Camotes gradwado na sa FSTP

CEBU, Philippines - Hapit tanang barangay sa Lungsod sa Tudela ang sakop na sa Farmers Scientist Training Program (FSTP) sa probinsiya.

Si Dr. Romulo Davide, 2012 Ramon Magsaysay Awardees ug FSTP founder, ang nangulo sa graduation sa 31 ka mag-uuma sa Barangay Buenavista niadtong nilabayng semana.

Si Davide, kinsa P1 a year Capitol consultant on agriculture ug uyoan ni Gobernador Hilario Davide III, uban ni Provincial Agriculturist Roldan Saragena nga nibisita sa nakompleto na nga FSTP support projects sa Tudela. Lakip sa maong proyekto ang P5 milyones nga farm-to-market road (FMR) ug P500,000 nga trading post. Si Davide nagkanayon nga ang Kapitolyo nisuporta sa mga mag-uuma sa lungsod pinaagi sa pagpanghatag og abuno, binhi ug karsada ug mao kini ang usa sa mga formula nga mahimong malampuson ang FSTP ug mga mag-uuma. Sa lungsod sa San Francisco, nikabat sa 118 ka mag-uuma ang nigradwar sa FSTP ug gawas niini unom sa farmers association (FA) ang nakadawat og water pumps, pipes ug plastic drums.

Ang mga ekipo gamiton sa pagkuha og tubig gikan sa Lake Danao paingon sa kaumahan sa palibot. Ang mga nakadawat sa nahisgutang ekipo gilangkuban sa Patabog FA sa Union, Igot FA sa Esperanza, Santa Cruz FA sa Santa Cruz, Canuche/Patabog Soli-Soli FA sa Campo, Bagong Silang nga Mag-uuma sa Cabunga-an ug Northern Poblacion Farmers and Fishermen’s Association.

Ang maong mga asosayon sa mag-uuma nagmintinar og umahan sa palibot sa lake.

Ang National Irrigation Administration mobutang og irrigation project sa lungsod gamit ang tubig gikan sa lake. Subay niini, nikabat sa 83 ka mag-uuma sa Lungsod sa Poro ang nakadawat usab og certificates human sila nipaubos sa FSTP. (BANAT NEWS)