State of emergency gideklarar

CEBU, Philippines - Si Cebu City Mayor Michael Rama mideklarar og state of emergency nunot sa nasinating kakuwang sa supply sa tubig tungod sa El Niño.

Si Rama mipatawag og panagtigom  sa mga representante sa Metropolitan Cebu Water District (MCWD), PAGASA, ug uban pang stakeholders aron tukion ang problema.

Matud ni Rama nga adunay gigahin nga pundo ang siyudad pagpangandam  kun adunay huwaw.

Ang PAGASA mipahibalo nang daan nga hangtud sa kataposan sa Mayo pa masinati ang El Niño dinhi sa Sugbo.

Sa gipagawas nga abiso sa MCWD, plano nila nga matag adlaw mopalit og 7,000 cubic meter nga tubig gikan sa Abejo Water Corp. nga nagbase sa Brgy.Luz  sugod karong buwana.

Kini maoy ilang i-rasyon sa mga lugar nga way agas nga gibanabanang di momenus 11 mil nga panimalay sa Metro Cebu.

Ang MCWD mibutyag nga kuwang sila og 273 cubic meter matag adlaw.

Gipahibalo sa MCWD nga magrasyon na sila og tubig sa Sitio Panabang, Sto. Niño, Calvary, Mahayahay, Fatima, Plaza, luyo sa GMA Grotto ug Citylights sa Brgy. Apas matag Lunes, Miyerkules, ug Biyernes hangtud mabalik sa normal ang supply sa tubig gikan sa Jaclupan, ug Buhisan dams.

Hinay ang pressure sa tubig sa Dakbayan sa Talisay, ug sa mga barangay sa Inayawan, Basak San Nicolas, Mambaling, Duljo Fatima ug  Pasil, Cebu City.

Sa debate nga gipasiugdahan sa Bombo Radyo kagahapon tali sa mga kandidato sa pagka-gobernador, tulo kanila ang nitambong ug nihatag og mga sugyot nga solusyon.

Si gubernatorial candidate Winston Garcia, misugyot nga mas maayo i-privatized ang nagsuplay og tubig. Buot niya nga bahinon kini sa tulo ka mga dapit.

Samtang si Boyet Cortes uyon siya sa sugyot ni Garcia ug paghimo usab og dugang water catchment sa kabukiran aron may kapundohan. Si Magnanao gusto nga padugangan ang mga dams sa Sugbo.

Sa laing bahin, nangayo og opinyon sa Commission on Elections (Comelec) ang Kapitolyo kabahin sa pagpagawas og pundo sa mga apektado sa El Niño.

Kini kun madeklarar balik o malugwayan ang pagpaubos balik sa state of calamity ang tibuok lalawigan.

Si Julius Regner ang tigpamaba sa Provincial Disaster Risk Reduction and Management Office (PDRRMO) nagkanayon nga buot nilang masayran kun unsay hustong proseso aron matabangan ang mga lungsod nga apektado na sa huwaw nga dili mapasanginlang namolitika.

Ang Kapitolyo adunay P34 Milyones nga quick response fund nga gitagana alang sa preparasyon sa katalagman sama sa El Niño.

Base sa Sec. 261 sa Omnibus Election Code gisaysay nga kun adunay kalamidad, kasagaran sa ayuda o pundo alang sa mga biktima ipaagi sa Philippine Red Cross. (BANAT NEWS)