CEBU, Philippines - Re-blocking gitinguha sa usa sa mga tag-iya sa yuta diin nahimutang ang kapin sa 200 ka balay nga naugdaw sa sunog sa Sitio Pungsod Lawaan 3 sa Dakbayan sa Talisay.
Matud pa ni Rolito Vello, usa sa mga tag-iya sa luna nga nahinabi sa Banat News nga magtigum pa sila sa iyang mga igsuon aron makapaguwa og desisyon nga para sa kaayohan nila ug sa mga nasunogan.
Lakip sa ilang tukion kun mahimo ba kini nilang low cost housing para tanang mga nasunogan aron sila mapahimutang.
Apan sa pagkakaron, wala usa silay gitugotan nga makatukod og permanenteng balay kay basin adunay mga kausaban.
Si Virgincita Padigos, Presidente sa Sitio Pungsod, Homeowners Association nitug-an sa Banat News nga maoy ilang tinguha nga makabalik gayud sila pagtukod og balik sa lugar tungod kay lisod kaayo ang pagpangita og laing kapuy-an.
Samtang si Kapitan Dalia Ybañez, nipadayag nga magtigum pa sila sa mga pamilya nga nanag-iya sa luna aron tukion kung unsay mga maayong solusyon sa problema karon sa 220 ka pamilyang nasunogan.
Base sa talaan sa DSWS adunay 212 ka mga struktura ang apektado sa sunog, o 1,045 ka individual.
Samtang pipila sa mga tinun-an nga nasunogan ang nanawagan aron sila tabangan kay ang pipila kanila mogradwar sa elementariya ug mag-moving up sa senior high school apan walay masul-ob tungod kay kadaghan sa ilang mga senina ang nalakip pagkasunog.
Si Anthony Jared Angcon, tinun-an sa Grade 3, gikan sa adlaw nga Lunes hangtod na kagahapon adlawa iya lang gibalik-balik ang iyang sapot nga gisul-ob tungod kay tanan niyang mga senina ang nasunog.
Nanawagan si Angcon nga tabangan silang mga estudyante nga makabaton og mga kagamitan sama sa ilang mga senina aron aduna silay magamit.
Gitug-an ni Angcon nga bisan nasunog ilang balay dili kini makapahuyang niya nga mopadayon sa pag-eskuyla kay tinguha niya mahimo nga usa ka pari. (BANAT NEWS)