CEBU, Philippines - Igo lang gipagawas sa balay ang asawa ug anak ayha nagpusil sa iyang ulo ang 74- anyos nga lolo nga giingong wala na nakaagwanta sa iyang sakit diha sa Sitio Tawig, Brgy. Palanas lungsod sa Alcantara sa nakalabay nga gabii.
Ang naghikog naila nga si Pascual Villaces, minyo, mag-uuma ug nagpuyo sa maong dapit.
Matud pa ni Police Officer 2 Madried Aparre, sakop sa alert team sa Alcantara Police nga dugay na diay nga gidaladala ni Villaces ang sakit niini sa asthma ug problema sa kasing-kasing.
Sumala pa ni Aparre nga niadtong nakalabay nga semana didto si Villaces sa Badian District Hospital kay nagpatan-aw sa doktor ug kini gisultihan nga pabalikon karong adlawa.
Gamit ang tayaon nga .38 rebolber gikatahong nagpusil si Villaces sa iyang ulo dihang nanglakaw ang iyang asawa ug anak.
Suway pa unta kini nga gidala sa Badian District Hospital apan gideklara kini sa doktor nga dead on arrival.
Narekober sa kapulisan sulod sa lawak ni Villaces ang usa ka .38 revolver nga wala’y lisensya. (BANAT NEWS)