CEBU, Philippines - Gihingusgan karon sa Cebu City Police Office (CCPO) ang pagpangita sa tanang adunay mga warrants of arrest pinaagi sa gihingusgang “Oplan Lambat Sibat” kagahapon nga miabot og 42 ka mga tawo.
Gipresentar ni Deputy Chief for Admin Senior Superintendent Artemio Ricabo ang mga nasikop sa nagkalain-lain nga estasyon human sila gipangsikop pinasikad sa ilang mga pending nga warrants of arrest. Dugang pa ni Ricabo nga sagad sa nasikop nalambigit sa estafa, illegal gambling, kalapasan sa ordinansa sa dakbayan, pagpangawat, illegal possession of firearms, attempted homicide, illegal recruiters ug uban pa.
Hinuon ang mga kaso nga giatubang sa maong mga suspek dili kaayo dagkong kaso.
Giawhag ni Ricabo ang tanan station commanders sa dakbayan nga padayonon ang pag-serve sa mga warrant.
Usa sa mga nasikop mao si Cirila Cabato, 54, mao ang clerk sa barangay hall sa Guadalupe tungod sa pasangil nga kini illegal recruiter.
Si Cabato nakapresentar og kopya sa desisyon ni Judge Estella Alma Singco sa Regional Trial Court Branch 12 nga gibasura na ang maong kaso, apan aduna pa kini laing kaso nga na-pending nga maoy giingong nalutsan og warrant.
Si Cabato kinsa lector sa simbahan miingon nga nabiktima lamang siya sa ahensya nga iyang natrabahoan, iyang giklaro nga wala siya’y na- recruit. (BANAT NEWS)