Duha namatay sa aksidente sa motor

CEBU, Philippines - Duha ang patay, ug lima ang angol human sa duha ka aksidente sa kadalanan nga naglambigit sa upat ka motorsiklo.

Sa Borbon, tulo ka motorsiklo nga gisakyan sa unom ka magkabarkada ang nangalamba pasado alas 11 sa miaging gabii sa kurbadahon nga dalan sa Brgy. Don Gregorio Antigua sa maong lungsod.

Wa na makaabot sa iya untang pamisitahan si Vince Doncillo, 18, human siya gideklarar nga dead on arrival sa Juan Dosado Memorial Hospital sa Sogod.

Naangol usab sila si Warren Mendoza, 16; Sherwin Casa, 18; Roberto Monteron, 18; Rex Monleon apan ang nagrabihan nila mao si Darrel Quimbo, 18, nga nag-angkas ni Doncillo.

Si Senior Police Officer 3 Owen Baticuang, desk officer sa Borbon Police Station nga nahinabi sa Banat News miingon nga naa karon sa talandogon nga kahimtang si Quimbo.

Apan ang iyang mga barkada naa pa sab sa hospital human nga silang tanan nadisgrasya samtang ilang gikuyogan si Doncillo nga mamisita sa iyang uyab.

Sumala pa ni Baticuang nga medyo dangog ang dalan kay nag-ulan niadtong higayona ug sa kurbadahong dapit naharos g’yud og ka-slide ang tulo ka motor nga gisakyan sa managbarkada.

Napasok sa railings kilid sa dalan ang motor nga gimaneho ni Doncillo apan naparok pa g’yud ang iyang ulo sa poste sa railings hinungdan nga nahiagom kini og grabeng kadaot.

Naglukot sa karsada ang magkabarkada ug maayo na lang nga may usa ka concerned citizen nga mapahibawo sa mga polis sa nahitabo hinungdan nga sila natabang.

Samtang patay ang usa ka lalaking nagmotor human nga nawad-an og kontrol sa kurbadahong dalan sa Brgy. Calumpang sa lungsod sa Oslob.

Base sa imbestigasyon nga samtang nagdagan ang motor nga gimaneho ni Gito Otida, 39, wa kini makakabig sa iyang manobela hinungdan nga natumba ug naparok ang iyang ulo sa kongkretong kanal hinungdan sa iyang kamatayon.

Nadala pa si Otida sa Oslob District Hospital apan gideklarar na kini nga dead on arrival. (BANAT NEWS)