CEBU, Philippines - Gidakop sa kapolisan ang 45-anyos nga lalaki nga nagdala og armas ug gituohang shabu atol sa security checkpoint sa Manuel L. Quezon Highway, Pajo, Dakbayan sa Lapu-Lapu alas 11:30 sa gabii niadto’ng Domingo.
Una’ng gipahunong sa kapolisan si Romulo Sereño, taga Mahayahay, Bankal, kay wala kini nagsul-ob og crash helmet samtang nagmaneho sa motorsiklo. Matud ni Police Senior Inspector Jaime Tolentino, officer-in-charge sa Gun-ob Police Station, nga ang nangulo sa checkpoint nga si SPO4 Joseph Joy Mandal nihunong kang Sereño.
Diha’ng niaksiyon og kanaug si Sereño sa motorsiklo, nabantayan sa kapolisan nga nagdala kini og armas nga giluklok sa kilid.
Dali’ng ni-alerto ang kapolisan ug gipangutana ni Mandal ang suspek kung ang gidalang .9mm nga pistola aduna ba’y dokumento apan wala’y napakita.
Nipahigayon og spot body search ang kapolisan kang Sereño ug nasakmit ang usa ka gamay’ng putos sa gituohang shabu, improvised tooter ug usa ka disposable lighter.
Nakompiska sab sa kapolisan ang tulo ka live ammunition rounds sa pusil.
Kasamtangang natanggong sa Gun-ob Police Station ang suspek ug nag-atubang kini og kaso’ng kalapasan sa Republic Act 9165 o ang Comprehensive Dangerous Drugs Act of 2002, illegal possession of firearms and ammunition ilabi na ang election gun ban. (BANAT NEWS)