CEBU, Philippines - Naka-jackpot ang mga kawatan human ila’ng nadala ang bag sa usa ka negosyante nga may daku’ng kantidad sa kwarta sa bag-ong merkado sa Dakbayan sa Naga pasado alas 12 sa nakalabay nga udto.
Ang biktima giila nga si Florille Badayos, 40, doktora ug negosyante nga nagpuyo sa mao’ng siyudad.
Matud ni Police Officer 2 Ramil Baroman, desk officer sa Naga City Police Station, nga pasado alas 12 sa udto duha ka babaye nga dunay kuyog nga duha ka bata ang naabot sa tindahan sa biktima ug nagpatuo nga mopalit og bugas, cooking oil ug lakip usa ka botelya sa bino.
Diha’ng nalipat ang biktima, gikuha sa gidudahang kawatan ang sling bag nga gibutang sulod sa tindahan.
Ulahi na nakabantay ang biktima nga nawala na ang iya’ng sling bag diha’ng dunay naabot nga laing kostumer ug nakabiya na sa lugar ang gituohang mga kawatan.
Sulod sa bag sa biktima ang P200 mil nga salaping cash, $20,000, 2,000 Canadian dollars, 110,000 Korean Won, Italian Gold nga P9,000; Saudi Gold necklace nga P18,000 ug uban pa nga importante nga dokumento.
Si Baroman niingon nga simple nga salisi lang ang gihimo sa mga biktima apan kini nakatayming lang og bag nga dunay daku nga kantidad sa salapi.
Usa sa kalisdanan sa kapolisan kay wala’y naka-montar nga close circuit television(CCTV) camera sa merkado kay bag-ohay pa lang gibalhinan sa mga manindahay.
Kini dili sama sa karaan nga merkado nga kompleto sa mga CCTV gumikan kay daghan na usab ang nabiktima sa pagpangawat.
Sigun pa ni Baroman nga lagmit modus na sa mga kawatan nga magdala og bata aron dili madudahan.
Gibana-bana nga moabot sa tunga sa milyon ka pesos ang kinatibuk-ang kantidad nga nakawat.
Apan ang kapolisan sa Dakbayan sa Naga padayon nga nihimo sa ila’ng imbestigasyon sa pamasin nga may nakaila sa mga kawatan. (BANAT NEWS)