CEBU, Philippines - Nagpadayon na ang tulo ka adlaw nga trainers’ training sa Commission on Election alang sa mga elections officers, assistants ug civil technician sa Rehiyon-7 nga gisugdan kagahapon.
Matud ni Atty. Eliseo Labaria, provincial election supervisor sa Sugbo, nga human sa training aduna’y examination nga buhaton diin kadto’ng mga makapasar hatagan og certification sa Comelec.
Ang dili makapasar dili mahimo’ng mo-train sa mga sakop sa Board of Election Inspectors karong Marso 1.
Karong adlawa ipahigayon usab sa Comelec ang training sa paggamit sa vote counting machines (VCM) diin itudlo ang actual operations, features lakip na ang transmission.
Gihulagway ni Labaria nga importante ang mao’ng training tungod kay mao kini ang gamiton panahon sa eleksiyon dungan sa pag-ingon nga kun wala ang training dunay posibilidad nga gubot ang mga voting centers.
Lakip sa gituki ang pag-ila sa mga poll watchers nga tugutang makasulod sa polling precincts.
Samtang hangyo sa ahensiya ngadto sa BEIs nga kinahanglan wala’y dapigan nga kandidato ug dili motabang sa pangampanya ug mosunod sa unsa’y nalatid sa balaud. (BANAT NEWS)