Nanunglo gipapriso

CEBU, Philippines - Nagtingkagol sulod sa prisohan sa Waterfront Police Station sa Dakbayan sa Sugbo ang usa ka manindahay og pagkaon diha sa “ticketing office” sa Pier Area sa Brgy. San Roque human kini gipadakop sa usa ka non-uniform personnel (NUP) tungod sa matud pa pagtunglo niini  kay wala mopalit sa iyang baligya.

Ang gipadakop mao si Jaime Alburo Canoy, 39, nagpuyo sa Arellano Boulevard sa maong dapit.

Samtang ang miaresto kaniya mao ang reklamante nga si NUP Indira Babe Cagata, 44, usa ka non-uniformed personnel sa kapolisan ug nadestino sa Police Regional Office-7.

Matud pa ni Police Officer 1 Mark Catipay, desk officer sa Waterfront Police nga nahinabi sa Banat News nipalit og ticket sa fastcraft  si Cagata ug gisigehan og agni ni Canoy pagpalit sa iyang baligyang otap ug ampaw, apan wala kini panumbalinga sa nagreklamo.

Apan sa dihang paingon na unta mosakay sa shuttle bus ang reklamante gikatahong nadunggan niini si Canoy nga miingon kaniya og: “Nagda lang ka’g malas may tag malunod nang imong gisakyan.”  Tungod niini, nangita og polis si Cagata ug gipadakop si Canoy. Sumala pa ni Catipay nga sa dihang nadala na si Canoy sa buhatan sa kapulisan, matud pa nga sa una, nagmagahi kini ug wala gani nangayo og pasaylo sa reklamante ug miinsister nga wala siya nanunglo. Apan si Cagata  mitinuod pagpasaka og kaso nga unjust vexation ni Canoy kagahapon. (BANAT NEWS)