Pito ka polis girelibohan

CEBU, Philippines - Pito ka mga sakop sa City Intelligence Branch sa Cebu City Police Office ang giparelibohan sa ilang katungdanan human  sila gipasanginlang ‘nanghulidap’ sa mga gidudahang drug personalities.

Si Senior Superintendent Rey Lyndon Lawas , deputy regional director for operations sa Police Regional Office-7 mibutyag nga mismo ang director sa Cebu City Police Office nga si Sr. Supt. Benjamin Santos maoy nimando niini.

Si Lawas miingon nga ang pagrelibo gihimo aron paghatag og dalan sa himuon nga imbestigasyon.

Ang pito ipaubos sa “camp restriction” samtang nagpadayon ang imbestigasyon.

Sumala pa ni Lawas nga lakip sa ilang tagaan og pagtagad ang pagpangita sa gikatahong duha ka mga dinakpan nga gipagawas kay aron sila ang magsilbing testigos sa hitabo ug makuhaan sila og testimoniya.

Gitahasan na ni Lawas ang hepe sa Regional Investigation and Detective Management Division-7 (RIDMD) nga makig-alayon sa mga imbestigador sa Investigation and Detective Management Branch (IDMB) sa CCPO sa gihimo usab niini nga imbestigasyon.

Gawas sa pagpatubag sa pito ka mga polis tan-awon usab kung adunay tulubagon ang mga opisyal sa CIB.

Sa pagtumaw sa maong isyu, nabuhi na usab karon ang kontrobersiya kaniadto sa CIB nga adunay ‘hudas’ sa ilang buhatan nga maoy tigtug-an sa mga target nga dakponon kung sila rondahon maong pirmeng makaikyas ang mga bigtime drug lords. (BANAT NEWS)