CEBU, Philippines - Napalgang patay na ang 15-anyos nga babaye kagahapon sa alas 8 sa buntag sulod sa panimalay nga iya’ng gibantayan sa Camella Homes Montserrat, Pajac, Dakbayan sa Lapu-Lapu.Gitataw ni Police Officer 3 Luisito Ernie, imbestigador sa Lapu-Lapu City Police Office-Homicide Section, nga una’ng nakakita sa patay’ng lawas mao ang amiga nga silingan nga si Alona Arcilla, 20-anyos.
Base sa pakisusi sa kapolisan, uwahi’ng kaestorya sa menor de edad si Arcilla alas 4 sa hapon sa niagi’ng Domingo apan sa pagtikang sa balay’ng gibantayan, nakurat si Arcilla sa sitwasyon sa bata.
Nakit-an ni Arcilla nga nagbitay sa may hagdanan ang lawas sa menor de edad ug dali siya’ng nitawag og emergency responder ug mga polis.
Nidugang si Ernie nga gabii sa Domingo pa gibuhat sa menor de edad ang paghikog tungod kay nigahi na ang lawas dihang gisusi sa taga Emergency Rescue Unit Foundation (ERUF).
Usa ka suicide note ang narekober sa kapolisan sulod sa kwarto sa menor de edad kinsa lumad nga taga Lungsod sa Dalaguete. “Sa sulod sa letter, niingon siya nga pasayloon daw siya sa iya’ng mga sala kay nakasala daw siya ug nagpasalamat siya sa pagtabang sa iya’ng giangkon nga mommy ug daddy,” matud ni Ernie.
Gipasabot nga "mommy" sa menor de edad mao si Arcilla apan wala matino kung kinsa ang giila niini’ng "daddy".
Posible’ng nakasinati og depresyon ang batan-on hinungdan nga nabuhat niya ang paghikog gamit ang nylon. Narekober sab sa kapolisan ang duha ka cell phone sa menor de edad ug kini susihon alang sa dugang nga detalye sa kamatayon sa batan-on. Second year high school sa usa ka pangpubliko’ng tunghaan ang menor de edad ug nagtrabaho isip caretaker sa balay sa usa ka foreigner kinsa tua pa sa Amerika.
Ang langyaw matud ni Ernie mao’y nagpaeskwela ug nagsweldo sa menor de edad.
Sa pagkutlo niini’ng balita, wala pa nasayud ang mga ginikanan sa bata samtang gidala sa ERUF ang patay’ng lawas sa Surelife Funeral Homes alang sa autopsy. (BANAT NEWS)