Gipatay atol sa Valentine’s Day

CEBU, Philippines - Patay ang usa ka 35-anyos nga lalaki human kini gidunggab sa iyang silingan nga 42 anyos diha sa Barangay San Jose lungsod sa Poro niadtong Valentine’s Day sa gabii.

Giila ang biktima nga si Renante Claros, samtang ang suspetsado mao si Ramel Donaire, manggabasay nga nagpuyo ra usab sa maong dapit.

Sumala pa ni Senior Inspector Jonas Tahanlangit, hepe sa Poro Police Station nga nahinabi sa Banat News nga usa sa ilang gitan-aw karon ang anggulo nga selos, love triangle ug personal nga bikil sa duha ang motibo sa maong pagpatay.

Matud pa ni Tahanlangit nga naabot sa balay sa biktima si Donaire kay nangutana kini ni Claros kung pila ang pangayo niini kun magpagabas og kahoy.

Apan matud pa kalit lang mibunot og kutsilyo si Donaire  ug  gihansakan sa lawas ang biktima. Dali pa unta nga gidala sa tambalanan sa lungsod sa San Francisco si Claros apan namatay ang biktima.

Apan nagtuo si Tahanlangit nga duna gayo’y dakung kalagot si Donaire ni Claros kay gisiguro man gayod niini nga iyang mapatay kini.

Wala hinuon mohatag og dugang impormasyon si Tahanlangit kabahin sa mga motibong ilang gidudahang hinungdan tungod kay gibase pa nila kini sa impormasyong ilang nakuha gikan sa mga kauban sa suspek.  (BANAT NEWS)